Talna- og aðgerðaskilningur fyrir yngsta stig

Námskeið í opnu Menntafléttunni

Staða

Ólokið

Verð

Opið námskeið

Hefja námskeið

Á námskeiðinu er unnið með hugmyndir um Stærðfræðikennslu byggða á skilningi barna. Skoðuð verða einkenni ólíkra þrautagerða. Einnig verða greindar lausnaleiðir sem fram koma í glímu barna við ólíkar þrautir og þær skoðaðar með tilliti til inntaks og kennsluhátta.

Fyrst verður fjallað um tegundir þrauta um sameiningu og aðskilnað og einnig um þróun lausnleiða barna á þannig þrautum. Því næst verður fjallað um þrautir um margföldun og deilingu og skilning barna á þeim og lausnaleiðir þeirra skoðaðar. Auk þess verður fjallað um tugakerfið og reikning barna með háum tölum.

Á námskeiðum Opnu Menntafléttunnar er gert ráð fyrir að þátttakendur nýti þróunarhring í fjórum skrefum, sem styður við samræður um innleiðingu breyttra starfshátta í námi og kennslu. Skrefin fjögur eru:

Skref A: Þátttakendur undirbúa sig með lestri eða áhorfi – og undirbúa spurningar.
Skref B: Þátttakendur funda með teymi sínu og gera áætlun um útfærslu í starfi.
Skref C: Þátttakendur og teymi þeirra framkvæmir áætlun og skrá hjá sér athuganir.
Skref D: Þátttakendur funda aftur með teyminu og ræða hvernig til tókst og hvernig nemendur brugðust við.

Kennarahópar sem ætla að taka námskeið á vef Opnu Menntafléttunnar geta fengið handleiðslu eða ráðgjöf frá sérfræðingum. Handleiðslan felst í að sérfræðingur hittir kennarahópinn í sex klukkustundir á námskeiðstímanum. Samkomulag er um tímasetningar fundanna. Gert er ráð fyrir að ráðgjöfin fari fram á ZOOM.

Skólastjóri verður að sækja um ráðgjöfina fyrir hönd síns skóla. Kostnaður við handleiðslu á einu námskeiði er 100 þúsund krónur sem skólinn borgar áður en ráðgjöfin hefst.

Hægt er að semja um sérsniðna handleiðslu fyrir hópa með því að senda tölvupóst á Katrínu Valdísi sem hefur netfangið kava@hi.is.

Hvar og hvernig fer námskeiðið fram?

Kennslan fer fram í sex rafrænum lotum, þrjár klukkustundir að lengd, skólaárið 2023-2024. Kennarar hafa hug á að vera með eina sex klukkustunda staðlotu í stað tveggja lota á vef á tímabilinu 15.-19. janúar. Nánari tímasetning staðlotunnar verður ákveðin í samráði við þátttakendur. Nám þátttakenda fer þó aðallega fram í skólum þátttakenda í samræðum teyma um þróun náms og kennslu. Þátttakendur fá hagnýtar kveikjur í lotunum sem þeir geta fléttað saman við daglegt starf. Þeir leiða svo samtal á teymisfundum í sínum skólum um hvernig gengur.

Í upphafi hverrar kennslulotu er farið yfir reynslu þátttakenda af því að nýta þróunarhringinn frá síðustu lotu (sjá mynd af þróunarhringnum hér fyrir neðan).