Menntafléttunámskeiðið
Stærðfræðin í umhverfi leikskólabarna er annað námskeiðið af þremur í flokki námskeiða um stærðfræði í leikskóla. Öll námskeiðin byggja á sex viðfangsefnum stærðfræðinnar sem Alan J. Bishop telur að séu til staðar í öllum menningarheimum.
Á þessu námskeiði, sem byggir á þróunarhringum 5-8, skoðum við hvernig stærðfræðilegu viðfangsefnin að
hanna og
staðsetja gefa börnum tækifæri til þess að skilja og hlutbinda rýmið í kringum okkur. Í dæmunum sem eru gefin er skoðað hvernig leikur getur haft áhrif á nám í leikskóla. Annars vegar með því að skoða ólíkar hugmyndir um leikgleði og hins vegar hvernig við bregðumst við óvæntum svörum barna og fullorðinna.
Kennslufræðileg áhersla í þróunarhring 5 – 8 beinist að þátttöku leikskólakennarans í starfi barnanna. Aðaláherslan er á að nálgast stærðfræðileg viðfangsefni í gegnum
staðsetningar og
hönnun.
Helsta markmið námskeiðsins er að efla skilning starfsmanna í leikskóla á hvað geta talist stærðfræðileg viðfangsefni leikskólabarna. Eftir námskeiðið er þess vænst að þeir verði hæfari til að skipuleggja, undirbúa og fylgja eftir vinnu barna í leikskólanum með það að markmiði að auka hæfni barnanna til að taka virkan þátt í stærðfræðilegum viðfangsefnum.
Grunnhugmyndin er að efni námskeiðsins sé nýtt til að efla og styrkja námssamfélag leikskólakennara og starfsfólks leikskóla í gegnum lestur, vinnu með börnum og umræður um stærðfræðinám barnanna. Þátttaka í námskeiðinu felst í að hitta samstarfsfólk til að ræða og skipuleggja vinnu barna með áherslu á stærðfræðileg viðfangsefni.
Við lok námskeiðs hafa þátttakendur kynnst:
- Leiðum til að taka þátt í námssamfélagi jafningja í eigin leikskóla með samtali, endurgjöf og ígrundun um breytta starfshætti.
- Lesefni og hugmyndum að viðfangsefnum tengdum stærðfræðinámi leikskólabarna.
- Hvernig hægt er að vinna að skráningum á vinnu barna á fjölbreyttan hátt.
- Hvernig skoða má hönnun og staðsetningar barna með stærðfræðigleraugum.
Námskeiðið byggir á sænskri fyrirmynd (
Förskolans matematik) frá Skolverket.
Mikilvægt er talið að þátttakendur íhugi og skrái hjá sér ígrundanir sínar um efni námskeiðsins og vinnu með nemendum. Skráningarform geta verið margskonar og skráning þarf ekki að taka langan tíma. Hér má sjá myndband um
gildi skráningar í kennslu og hér má finna texta sem fjallar um hvernig
dagbókarskrif geta stutt við starfsþróun kennara.
Mælt er með að leiðtogar kynni sér undirbúningsefni námskeiðsins þar sem m.a. er gerð grein fyrir hlutverki leiðtoga og vinnuferli
Menntafléttunámskeiða (veggspjald).
