„Náttúrufræðin er lífið allt, hún kemur alls staðar við sögu í daglegu lífi; hvað þú borðar, hvernig þú hreyfir þig á milli staða og nýtir það sem þú hefur. Þess vegna er svo skemmtilegt að samþætta hana öðrum námsgreinum. Eiginlega nauðsynlegt.“ Ólöf Ása og Óðinn, kennarar námskeiðsins og kennarar í Hrafnagilsskóla.

Markmið námskeiðsins er að styðja þátttakendur við að skipuleggja og útfæra kennslu með áherslu á samþættingu náttúrufræði með öðrum námsgreinum. Námskeiðið er ætlað kennurum sem hafa hug á að tengja saman vinnu með ólíkar námsgreinar og setja sérstaka áherslu á náttúrugreinar og með því opna á möguleika þess að vinna nýja nálgun í námi nemenda. Einnig er námskeiðinu ætlað að styrkja þátttakendur í teymiskennslu og samvinnu með hliðsjón af samþættingu. Fjallað verður um viðfangsefni hverrar lotu út frá samþættu verkefni sem kennarar námskeiðsins hafa þegar nýtt í kennslu.

Við lok námskeiðs geta þátttakendur:

• Leitt samtöl um breytta starfshætti í námssamfélögum og teymum í skólum og á vinnustöðum.

• Nýtt fjölbreytt verkefni sem auka virkni og valdefla nemendur.

• Nýtt sér hagnýtar leiðir til þess að samþætta náttúrufræði við aðrar námsgreinar.

• Komið auga á kosti teymiskennslu og hafa lært leiðir að farsælli samvinnu.